KHUTBAH JUM’AT BAHASA JAWA : ISRA’ MI’RAJ NABI MUHAMMAD SAW

KHUTBAH JUM’AT BAHASA JAWA

ISRA’ MI’RAJ NABI MUHAMMAD SAW

Oleh : ANIS PURWANTO

إِنَّ الْحَمْدَ لِلَّهِ نَحْمَدُهُ وَنَسْتَعِيْنُهُ وَنَسْتَغْفِرُهُ وَنَسْتَهْدِيْهِ وَنَعُوذُ بِاللهِ مِنْ شُرُوْرِ أَنْفُسِنَا وَمِنْ سَيِّئَاتِ أَعْمَالِنَا، مَنْ يَهْدِهِ اللهُ فَهُوَ الْمُهْتَدُ وَمَنْ يُضْلِلْ فَلَنْ تَجِدَ لَهُ وَلِيًا مُرْشِدًا. أَشْهَدُ أَنْ لاَ إِلَهَ إِلاَّ اللهُ وَحْدَهُ لاَ شَرِيْكَ لَهُ وَأَشْهَدُ أَنَّ مُحَمَّدًا عَبْدُهُ وَرَسُوْلُهُ لاَ نَبِيَّ بَعْدَهُ. اَللَّهُمَّ صَلِّ وَسَلِّمْ وَبَارِكْ عَلَي حَبِيْبِنَا وَشَفِيْعِنَا وَمَوْلَنَا مُحَمَّدٍ وَعَلَى آلِهِ وَأصَحابهِ اْلأَخْيَارِ وَمَنْ تَبِعَهُمْ بِإِحْسَانٍ إِلَى يَوْمِ الدِّيْنِ.

قَالَ تَعَالَي عَزَّ مِنْ قَائِلٍ: يَا أَيُّهَا الَّذِينَ آمَنُوا اتَّقُوا اللَّهَ حَقَّ تُقَاتِهِ وَلَا تَمُوتُنَّ إِلَّا وَأَنْتُمْ مُسْلِمُونَ. أَمَّا بَعْدُ.

Ma’asyiral Muslimin jamaah jum’ah rokhimakumullah.

Langkung rumiyin, sumangga kita sami nyaosaken puja puji syukur ing ngarsa dalem Allah SWT, ingkang sampun paring nikmat, rahmat sarta hidayah dhumateng kita sedaya. Sahingga kanthi ijin Allah SWT, kita saget nindakaken ibadah dhumateng Allah SWT. Kita nyuwun dhumaateng Allah SWT mugi-mugi ibadah kita ing siyang punika saget katampi dening Allah SWT, amin ya rabbal ‘alamin.

            Shalawat saha salam mugia katur dhumateng Gusti Rasul, Nabi Agung Muhammad SAW, ingkang sampun mbimbing dhumateng sedaya kaum muslimin, tumuju margi ingkang utami. Mugi-mugi kita sedaya pikantuk syafaatipun mbenjang wanten ing yaumul kiyamah, bekja fiddun ya wal akhirah, amin ya rabbal ‘alamin.

Ma’asyiral Muslimin jamaah jum’ah rokhimakumullah

            Nembe kemawon kita sesarengan mrengeti Isro’ Mi’roj Nabi Agung Muhammad SAW, tepatipun rikala tanggal 3 April 2019 utawi tanggal 27 Rejeb 1440 H. kalih dinten kepengker.  Isra’ Mi’raj kacatet minangka satunggaling saat bersejarah , mujudaken satunggaling kedadosan ingkang sacral, perjalanan suci , ingkang sekaligus mujudaken salah satunggaling mukjizat saking Allah SWT. . Sahingga tumraping Mukmin-Muslim klebet ewonipun kedadosan ingkang wajib kita yakini.

            Wondene ayat Al-Qur’an ingkang dados dasar wontenipun prastawa Isro’ Mi’roj Nabi Muhammad SAW punika Surat Al-Isra’ ayat 1

سُبۡحَـٰنَ ٱلَّذِىٓ أَسۡرَىٰ بِعَبۡدِهِۦ لَيۡلاً۬ مِّنَ ٱلۡمَسۡجِدِ ٱلۡحَرَامِ إِلَى ٱلۡمَسۡجِدِ ٱلۡأَقۡصَا ٱلَّذِى بَـٰرَكۡنَا حَوۡلَهُ ۥ لِنُرِيَهُ ۥ مِنۡ ءَايَـٰتِنَآ‌ۚ إِنَّهُ ۥ هُوَ ٱلسَّمِيعُ ٱلۡبَصِيرُ :

“Maha suci Dzat kang nglakokake kawulane ana ing mangsa bengi saka Masjidil Haram tumeka marang Masjidil Aqsha kang wus Sun berkahi sakiwa-tengene, jalaran Ingsun kepareng nuduhake marang kawulaningsun mau, sebagian saka tandha-tandha kuwasaningsun. Satemene Allah iku Maha Midhanget, lan Maha Ngawuningani ”.

Ma’asyiral Muslimin jamaah jum’ah rokhimakumullah

            Ayat 1 Surat Al-Isra’ isi piwucal pokok lan penting bilih Allah SWT kepareng paring pirsa dhateng Utusanipun, Panutan kita Kanjeng Nabi Muhammad SAW,  tandha-tandha keagunganipun saha kuwaosipun Allah SWT ing prastawa Isra’ Mi’raj punika, temtu kanthi maksud lan tujuan ingkang sakelangkung luhur selaras kaliyan kalenggahanipun Kanjeng Nabi ingkang jumeneng Rasul pungkasan, ingkang kautus dhateng sedaya manungsa, minangka pengejawantahan rahmat welas asihipun Allah SWT dhateng sedaya para kawula lan makhlukipun.

وَمَآ أَرۡسَلۡنَـٰكَ إِلَّا رَحۡمَةً۬ لِّلۡعَـٰلَمِينَ

“Lan Ingsun ora ngutus marang sira Muhammad, kejaba kanthi maksud minangka rahmat ingsun tumrape kabeh para makhluk ing sakabehe alam saisine ”.(QS. Al-Anbiya’:107).

            Saking ayat 1 surat Al-Isro’ punika kita ugi saged mendhet  pangertosan bilih tujuan dalah hikmah ingkang winengku wanten salebeting peristiwa Isro’ Mi’roj, mboten sanes kajawi peningkatanipun aqidah kita.   Pramila sumangga kita sedaya samia saged ningkataken iman saha taqwa kita dhumateng Allah SWT, ingkang kanthi makaten sageda mahanani ningkatipun amal shalih kita, jer yektosipun , iman punika mujudaken sumbering sedaya kesaenan.

Ma’asyiral Muslimin jamaah jum’ah rokhimakumullah

            Hikmah utawi piwucal ingkang  saged kita pethik saking prastawa Isra’ Mi’roj inggih punika .bilih peristiwa Isr’ipun Rasulullah punika “Minal Masjidil Haram ilal Masjidil Aqsha”, ingkang ateges saking masjid dhateng masjid. Bab punika perlu sanget kita aturaken, saperlu ndadosna ing kawuningan kita sedaya, bilih wanten salebetipun Isra’ Mi’roj punika tetela masjid anggadhahi peranan ingkang sakelangkung wigatos. Sahingga lumantar pengetan isra’ Mi’raj , kita umat Islam ugi dipun engetaken supados sami ningkataken kawigatosanipun dhateng masjid, ingkang ateges mangga sami memakmurkan masjid utawi ndamel syiaripun agami islam mawi sarana masjid.

Salejengipun hasil saking prastawa Isra’ Mi’raj inggih punika bilih Gusti Rasulullah lan sedaya ummatipun dipun wajibaken nindakaken shalat fardhu gangsal wekdal salebetipun saben sedinten sedalunipun . Lan tetela, sak sampunipun kita kaji kanthi lebet lan tuntas, shalat ingkang dipun wajibaken dening Allah dhateng kita punika tetela ageng sanget manfaatipun, kanthi syarat shalat ingkang dipun tindakaken kanthi khusyu’ :

قَدۡ أَفۡلَحَ ٱلۡمُؤۡمِنُونَ (١) ٱلَّذِينَ هُمۡ فِى صَلَاتِہِمۡ خَـٰشِعُونَ (٢)

“Temen-temen begja banget wong-wong mukmin iku. Yoiku wong –wong kang khusyu’  sajrone sholate”.(QS. Al-Mukminun : 1-2)

Kanthi shalat ingkang khusyu’ lan tuma’ninah kajawi ganjaran ingkang inggil ugi mahanani kareksa dening Allah lan tinebihaken saking sawernining tumundak jahat lan kemungkaran.

وَأَقِمِ ٱلصَّلَوٰةَ‌ۖ إِنَّ ٱلصَّلَوٰةَ تَنۡهَىٰ عَنِ ٱلۡفَحۡشَآءِ وَٱلۡمُنكَرِ‌ۗ  

“Lan sira ngedegna shalat. Awit satemene shalat iku nyegah saka tumindak jahat lan tumindak mungkar”.(QS. Al-‘Ankabut : 65).

Ma’asyiral Muslimin jamaah jum’ah rokhimakumullah

            Saking keterangan ingkang magepokan kaliyan Isa’ Mi’raj Nabi Muhammad SAW ingkang sekedik lan ringkes punika, kita lajeng saget mendhet kesimpulan bilih shalat minangka tugas wajib ingkang kedah kita ayahi , gangsal wekdal saben sedinten sedalunipun. Malah langkung sampurna bilih kita tindakaken kanthi berjamaah lan ugi katambah shalat sunahipun. Mugi-mugi kita saget mendhet hikmah ingkang winengku saking anggen kita sampun nindakaken prengetan isrta’ Mi’raj Kanjeng Nabi muhamma SAW, kanggeh anggayuh kabegjan ing ndonya dalah ing akhirat. Amin ya rabbal ‘alamin.

بَارَكَ اللهُ لِيْ وَلَكُمْ فِي الْقُرْآنِ الْعَظِيْمِ، وَنَفَعَنِيْ وَإِيَّاكُمْ بِمَا فِيْهِ مِنَ اْلآيَاتِ وَالذِّكْرِ الْحَكِيْمِ. أَقُوْلُ قَوْلِيْ هَذَا وَأَسْتَغْفِرُ اللهَ الْعَظِيْمَ لِيْ وَلَكُمْ وَلِسَائِرِ الْمُسْلِمِيْنَ مِنْ كُلِّ ذَنْبٍ. فَاسْتَغْفِرُوْهُ، إِنَّهُ هُوَ الْغَفُوْرُ الرَّحِيْمُ.