KHUTBAH IDUL ADHA BAHASA JAWA 1440 H / 2019 M : PENGURBANAN LAN KAMARDIKAN

KHUTBAH IDUL ADHA  BAHASA JAWA 1440 H / 2019 M

PENGURBANAN LAN KAMARDIKAN

Dening : Anis Purwanto

اَلسَّلاَمُ عَلَيْكُمْ وَرَحْمَةُ اللهِ وَبَركَاَتُهُ

الله أكبر الله أكبر الله أكبر الله أكبر الله أكبر الله أكبر الله أكبر

الله أكبر الله أكبر

اَللهُ أَكْبَرْ كَبِيْرًا وَالْحَمْدُ للهِ كَثِيْرًا وَسُبْحَانَ اللهِ بُكْرَةً وَأَصِيْلاً، لَاإِلهَ إِلاَّ اللهُ وَحْدَهُ، صَدَقَ وَعْدَهُ وَنَصَرَ عَبْدَهُ وَأَعَزَّ جُنْدَهُ وَهَزَمَ الْأَحْزَابَ وَحْدَهُ، لاَإِلهَ إِلاَّ اللهُ وَاللهُ أَكْبَرُ، اَللهُ أَكْبَرُ وَللهِ اْلحَمْدُ

اَلْحَمْدُ لِلّهِ رَبِّ الْعَالَمِيْنَ نَحْمَدُهُ وَنَسْتَعِيْنُهُ وَنَسْتَغْفِرُهُ وَنَتُوْبُ اِلَيْهِ وَنَعُوْذُ بِاللهِ مِنْ شُرُوْرِ اَنْفُسِنَا وَسَيِّئَاتِ اَعْمَالِنَا مَنْ يَهْدِ اللهُ فَلاَ مُضِلَّ لَهُ وَمَنْ يُضْلِلْ فَلاَ هَادِيَ لَهُ. اَشْهَدُ اَنْ لاَ اِلهَ اِلاَّ اللهُ وَحْدَهُ لاَ شَرِيْكَ لَهُ وَاَشْهَدُ اَنَّ مُحَمَّدًا عَبْدُهُ وَرَسُوْلُهُ وَالصَّلاَةُ وَالسَّلاَمُ عَلَى نَبِيِّنَا مُحَمَّدٍ وَعَلَى ءَالِهِ وَاَصْحَابِهِ وَمَنْ تَبِعَهُ اِلَى يَوْمِ الدِّيْنِ. اَمَّا بَعْدُ: فَيَاعِبَادَ اللهِ : اُوْصِيْكُمْ وَنَفْسِي بِتَقْوَ اللهِ وَطَاعَتِهِ لَعَلَّكُمْ تُفْلِحُوْنَ. قَالَ اللهُ تَعَالَى فِى الْقُرْآنِ الْكَرِيْمِ: يَااَيُّهَا الَّذِيْنَ اَمَنُوا اتَّقُوا اللهَ حَقَّ تُقَاتِهِ وَلاَ تَمُوْتُنَّ اِلاَّ وَاَنْتُمْ مُسْلِمُوْنَ

Allahu Akbar, Allahu Akbar, Allahu Akbar, laa ilaaha illallahu Allahu Akbar, Allahu Akbar walillahil hamdu.

Jama’ah Shalat idul Adha Rakhimakumullah.

            Minangka pambukaning atur, sumangga sesarengan kita ngeningaken cipta saha manah, kanthi ngaturaken pujo puji syukur ing ngarso dalem Allah SWT, Gusti ingkang Maha Agung. Ingkang sampun paring kanugrahan saha kanikmatan dumateng kita sedaya, sahingga ngantos  ing enjangipun Idul Adha  punika kita saged nindakaken pangibadahan dumateng Allah SWT. Kita nyuwun dumateng Allah SWT mugi-mugi ibadah kita katampi dening Allah SWT. Sahingga kita manggih kawilujengan ing donya dumugi ing akherat.

Shalawat saha salam mugia katur dhumateng junjungan kita, Nabi Agung Muhammad SAW, ingkang sampun mbimbing dhumateng sedaya kaum muslimin, nuju margi ingkang utami. Mugi-mugi kita sedaya pikantuk syafaatipun mbenjang wanten ing yaumul kiyamah, amin ya rabbal ‘alamin.

Jama’ah Shalat idul Adha Rakhimakumullah.

            Gusti ingkang Maha Agung lan Moho Mirah, Allah SWT, ndadosaken Ariyadin Adha punika dinten penyerahan lan pengorbanan kangge sedaya  kawulanipun Allah SWT, ingkang tansah ngabekti dhumateng ngarsanipun, kajawi punika Ariyadin Adha minangka lambangipun keagungan lan keluhuran saha sucinipun Agama Islam, lambang pesederean lan kerukunan ing antawisipun sesami umat Islam, ugi antawisipun setunggal golongan saha bangsa sanes. Pramila kanthi manah ingkang yakin, mboten wonten ingkang patut kita sembah kejawi namung Gusti Allah.

            Ing enjang punika kita umat Islam mangayubagya dhatengipun dinten agung “Idul Adha” kanthi nindakaken sarangkeaning ibadah ritual ingkang mila sampun dipun syariataken dening agami . wondene caranipun inggih punika sarana ngumandhangaken kalimah takbir, tahmid lan tahlil,  minangka tandha bukti anggen kita ngegungaken asmanipun Allah SWT. “ Allahu Akbar, Allahu Akbar, Allahu Akbar, laa ilaaha illallahu Allahu Akbar, Allahu Akbar walillahil hamdu. Kajawi ngumandhangaken kalimah takbir ingkang dipun wiwiti kalawau dalu , malah wanten ingkang ngawantenaken takbir keliling, gumuruh ngebaki angkasa. Kita ugi kadhawuhan nindakaken shalat Idul Adha kados ingkang nembe kita tindadaken kalawau. Salajengipun, kagem ingkang sampun mampu kadhawuhan mragat kewan qurban ingkang dagingipun kabagi-kabi kangge kaum dhuafa’.

            Kita ugi muji syukur dhumateng ngarsa dalem Allah SWT, bilih ing Idul Adha tahun punika, kita Bangsa Indonesia badhe mengerti HUT RI ingkang kaping-74. Bab punika penting kita aturaken ing awal khutbah, kanthi pangajab mugia kita sedaya nyadari bilih kamardikan saking penjajah Walandi, mboten kamardikan final, nanging tetep berjuang terus kangge ngisi kamardikan, ingkang tartamtu kedah ugi kanthi pangurbanan.

            Wondene lekas ingkang kapisan wajib kita tindakaken salebetipun mengeti dinten agung Nasional inggih punika nyaosaken syukur dhumateng Allah SWT. Mila pengetan proklamasi punika mangke motiv ingkang paling utami kulo kinten kedah wonten unsur , “Mensyukuri ramhat lan kanikmatan peparingipun Allah”, awit wonten muqodimahipun UUD 1945 piyambak ugi dipun tegasaken, bilih kamardikan bangsa lan nagari Indonesia punika mujudaken rahmat welas asih peparingipun Allah dhateng bangsa lan rakyat Indonesia,  “Atas rahmat Allah Yang Maha Kuasa dan dengan didorongkan oleh keinginan yang luhur, supaya berkehidupan kebangsaan yang bebas, maka rakyat Indonesia menyatakan dengan ini kemerdekaannya”. Mila saking punika, kita bangsa lan rakyat Indonesia wajib muji syukur dhumateng Allah SWT. Ingkang makaten punika awit ngestokaken dhawuh pangandikanipun Allah SWT, Surah Ibrahim ayat 7 :

وَإِذۡ تَأَذَّنَ رَبُّكُمۡ لَٮِٕن شَڪَرۡتُمۡ لَأَزِيدَنَّكُمۡ‌ۖ وَلَٮِٕن ڪَفَرۡتُمۡ إِنَّ عَذَابِى لَشَدِيدٌ۬

“Lan sira kabeh padha eling nalika Pangeranira ngundhangake dhawuh mangkene :”Yen sira kabeh nyata-nyata padha gelem syukur marang Allah, sayekti Ingsun bakal paring tambahan kanikmatan marang sira kabeh. Nanging yen sira kabeh malah  ngengkari kanikmatan peparingingsun, ngertia satemene pasiksaningsung iku abot banget”.(QS. Ibrahim :7).

Jama’ah Shalat idul Adha Rakhimakumullah.

Kamardikan rapet sanget sesambetanipun kaliyan pengurbanan. Malah kamardikan mboten badhe  kagayuh, yen tanpa wonten pangurbanan. Makaten ugi ngisi kamardikan, dipun perlokaken sanget wontenipun pengurbanan. Wondene bentukipun ngisi kamardikan punika mboten  wonten sanes kajawi sarana pembangunan. Lan ngengingi bab pembangunan punika,  Alhamdulillah, kita bangsa Indonesai dumugi ing saat sapunika taksih wonten salebetipun mbangun. Lan kasil saking pembangunan punika sampun saget dipun raosaken dening kita sedaya bangsa lan rakyat Indonesaia. Ingkang mesthi kemawon pembangunan punika taksih kedah kita terusaken lan kita tingkataken, murih tujuanipun pembangunan punika piyambak tumunten saget kita gayuh. Inggih punika, Nagari ingkang “BALDATUN TOYYIBATUN WA RABBUN GHAFUUR”.

            Pembangunan ingkang kita leksanakaken, pancen sekelangkung wiyar sanget tebanipun, sahengga asring kasebat “Pembangunan manusia seutuhnya dan pembangunan masyarakat Indonesia seluruhnya”. Karana  agengipun gegayuhan saking Pembangunan Nasional, tartamtu mbetahaken partisipasi saking sedaya lapisan masyarakat wanten ing sedaya bidang, selaras kaliyan pakaryan lan profesi kita piyambak-piyambak. Sebab, Pembangunan Nasional, mujudaken pengejowantahan saking taqwa kita dhumateng Allah SWT. Selajengipun keberhasilan pembangunan ingkang lelandasan sikap pengurbanan menika badhe saged ngagungaken syi’ar Allah lan syi’ar Islam ing bumi Indonesia menika :

وَمَن يُعَظِّمۡ شَعَـٰٓٮِٕرَ ٱللَّهِ فَإِنَّهَا مِن تَقۡوَى ٱلۡقُلُوب

“Lan sing sapa ngagungake syi’ar-syia’re Allah, prayata iku saka ati kang taqwa”. (QS. Al-Hajji :32)

Jama’ah Shalat idul Adha Rakhimakumullah.

Kathah hikmah ingkang saged kita pethik saking prengetan Proklamasi Kamardikan ingkang wekdalipun celak sanget kaliyan kita mahargya dinten Idul Adha punika. Kamardikan lan pengurbanan, mila pancen rapet sanget sesambetanipun. Kamardikan lan pengurbanan punika ngengetaken kita dhumateng para pahlawan lan syuhada’ ingkang gugur mbelani tanah wutah erahipun saking penjajahanipun bangsa asing. Berkat pengurbananipun para syuhada’ lan pahlawan punika, kita samangke saged ngraosaken nikmatipun gesang wonten ing alam kamardikan.

Allahu Akbar, Allahu Akbar, Allahu Akbar, laa ilaaha illallahu Allahu Akbar, Allahu Akbar walillahil hamdu.

            Ucapan takbir punika ugi ngumandhang wanten ing angkasa, nalika kita miwiti revolosi ing wulan Agustus 1945. Kanthi pekikan takbir punika para pejuang gumregah semangatipun, ngadhepi mengsah ingkang anggadhahi persenjataan modern, nyorohaken jiwa lan ngurbanaken nyowonipun, mbebasaken bangsa lan negari saking jajahanipun bangsa sanes.

            Kanthi kamardikan punika harkat lan martabatipun bangsa Indonesia setaraf lan sejajar kaliyan bangsa-bangsa sanes ing donya. Sebab, inggil utawi andaping drajatipun manungsa namung dipun bentenaken dening ketaqwaanipun dhumateng Allah SWT :

يَـٰٓأَيُّہَا ٱلنَّاسُ إِنَّا خَلَقۡنَـٰكُم مِّن ذَكَرٍ۬ وَأُنثَىٰ وَجَعَلۡنَـٰكُمۡ شُعُوبً۬ا وَقَبَآٮِٕلَ لِتَعَارَفُوٓاْ‌ۚ إِنَّ أَڪۡرَمَكُمۡ عِندَ ٱللَّهِ أَتۡقَٮٰكُمۡ‌ۚ إِنَّ ٱللَّهَ عَلِيمٌ خَبِيرٌ۬

 “E para manungsa! Ingsun wis gawe sira, kang wijine saka wong lanang lan wadon, lan Ingsun dadekake pirang-pirang bangsa lan golongan supaya padha tepung antara siji lan sjijine. Satemene wong kang paling mulya ing antarane sira kabeh mungguhe Allah, yaiku wong kang paling bekti marang Allah. Satemene Allah iku Maha ngawuningani tur Maha wicaksono”.(QS. Al-Hujarat : 13).

Jama’ah Shalat idul Adha Rakhimakumullah.

            Jumbuh kaliyan dhawuh punika , kala wingi tanggal 9 Dzul hijjah, sedaya jamaah haji ingkang jumlahipun yutan , sami nindakaken wukuf ing ara-ara Arofah. Wukuf mujudaken puncakipun ibadah haji. Wonten ing padang Arofah punika jamaah haji saking sedaya bangsa kepanggih. Pepanggihan bangsa-bangsa saindenging donya, ingkang nunggil agami lan nunggil aqidah, tetela nyadaraken kita dhateng wontenipun persamaaning asal-usulipun manungsa.

            Wonten ing saat lan papan punika mboten wonten tiyang engkang nggatosaken dhateng pangkat, drajat lan kalenggahan. Sedaya jamaah engkang nembe wukuf, sami ngagem ageman “Ikhram”, sarwa pethak lan tanpa dipun jahit. Lan sedaya sami ngucapaken ucapan tuwin donga ingkang seragam ugi, sedaya memuji dhumateng Gusti Ingkang Murbaeng Dumados , kanthi kalimah “Talbiyah”:

“Nuwun inggih sendika dhawuh dalem, Gusti. Dhuh Gusti, kula tansah mbangun turut dhawuh Paduka. Mbaten wanten sekutu kagem Paduka. Sayektosipun sedaya puji lan sawernining kanikmatan punika kagungan Paduka. Lan namung Paduka ingkang nguwaosi samubarang dhengah, lan mbaten wanten ingkang nyekuthoaken kuwaos Paduka”.

            Ruh Islam ingkang mancar saking kalimah talbiyah lan ugi kalimat takbir mujudaken sumber kekiyatan bangsa Indonesia ing rikala samanten ngrebat lan mertahanaken kamardikan, Sejarah kamardikan Indonesia nyerat pahlawan Nasional kadosta Tuanku Imam Bonjol, Pangeran Diponegoro, Kyai Mojo, Pangeran Antasari, Cik Ditiro, minangka para syuhada’ ingkang berjuang ngagem agemam jubah lan serban, sami kaliyan ageman ihkram.

Al-Qur’an Surat Al-Haj ayat 39 nyebadaken makaten :

أُذِنَ لِلَّذِينَ يُقَـٰتَلُونَ بِأَنَّهُمۡ ظُلِمُواْ‌ۚ وَإِنَّ ٱللَّهَ عَلَىٰ نَصۡرِهِمۡ لَقَدِيرٌ

 “Wis dikeparengake perang tumrape wong-wong kang diperangi, jalaran wong-wong mau dianiaya,. Satemene Allah iku kuwasa nulung wong-wong mau”.

            Ayat Al-Qur’an punika ugi ingkang paring semangat juangipun para pahlawan kusumaning bangsa nglawan kaum penjajah. Lan kangge kamardikan bangsa lan negarinipun punika para pahlawan lan syuhada’ lega lila lan ihklas ngedalaken pangurbanan, punapa malih pengurbanan punika jer mujudaken prentahipun agami, kados ingkang sampun dipun contoaken Nabi Ibrahim as lan Nabi ismail as.

Jama’ah Shalat idul Adha Rakhimakumullah.

            Dene sejarah wontenipun syariat kurban wontenipun prastawa nalika Kanjeng Nabi Ibrahim as rikala dipun uji mental saha imanipun dening Allah SWT,  kanthi kadhawuhan supados mragat putra kinasih, Nabi Ismail as. Nabi Ibrahim as ngestokaken dhawuhipun Allah punika tanpa tidha-tidha. Keng putra piyambak, Nabi Ismail as, wontenipun inggih ihklas, namung sumarah lan manut. Kados kasebat wonten Al-Qur’an Surat Ash-Shoffat ayat 102 :

فَلَمَّا بَلَغَ مَعَهُ ٱلسَّعۡىَ قَالَ يَـٰبُنَىَّ إِنِّىٓ أَرَىٰ فِى ٱلۡمَنَامِ أَنِّىٓ أَذۡبَحُكَ فَٱنظُرۡ مَاذَا تَرَىٰ‌ۚ قَالَ يَـٰٓأَبَتِ ٱفۡعَلۡ مَا تُؤۡمَرُ‌ۖ سَتَجِدُنِىٓ إِن شَآءَ ٱللَّهُ مِنَ ٱلصَّـٰبِرِينَ

“Wusana nalika anake, Ismail iku wus tekan saguh usaha, bebarengan karo dheweke, Ibrahim banjur kandha : Dhuh ngger anakku, Rama pirsa ana ing sajrone impen, yen rama kadhawuhan dening Allah nyembelih sira, ngger. Mula saka iku pikiren. Ismail banjur matur: Dhuh rama, sumangga kula aturi nindakaken punapa ingkang kadhawuhaken dhumateng panjenengan, rama. Insya Allah rama badhe pirsa, bilih kula kalebet golonganipun tiyang-tiyang ingkang sabar”.

            Kanthi mendhet piwucal adiluhung saking kisah ketaatanipun Nabi Ibrahim as lan Nabi ismail as, dipun ajab wanten ningkatipun ketaatan kita dhumateng Allah saha Utusanipun, lan ningkatipun keihklasan berkurban. Kita yakin kanthi seyakin-yakinipun, bilih gegayuhan satunggalipun cita-cita utawi idham-idhaman kedah sarana pengurbanan. Saya ageng gegayuhan ingkang dipun tuju, ugi kedah saya ageng pengubanan ingkang dipun wedalaken, minangka tebusanipun gegayuhan kala wau.

            Kurban dadas buktining ketaatan, lan ugi buktining katresnan. Trisna tanpa pengurbanan naminipun trisna palsu. Wanten ing Surat Ali imran ayat 92 dipun aturaken :

لَن تَنَالُواْ ٱلۡبِرَّ حَتَّىٰ تُنفِقُواْ مِمَّا تُحِبُّونَ‌ۚ وَمَا تُنفِقُواْ مِن شَىۡءٍ۬ فَإِنَّ ٱللَّهَ بِهِۦ عَلِيمٌ۬

 “Sira kabeh ora bakal bisa oleh kebecikan kejaba yen wis padha gelem ngurbanake sebagian barang kang kok tresnani. Lan apa bae kang kok kurbanake (infakake), satemene Allah iku Maha Mirsani marang apa bae kang kok tindakake”.                 

Jamaah Shalat Idul Adha Rakhimakumullah.

            Ngantos ing saat mahargya Idul Adha ing tahun 1440 H punika, kita bangsa Indonesia kanthi berkelanjutan tetep nerusaken   karya ageng Pembangunan Nasional, senaoso ugi taksih ngadhepi mawarni-warni ujian ingkang ugi mboten entheng, kadosta mrosotipun moral “anak bangsa” , koropsi, kolosi lan nepotisme taksih tuwuh subur. Risakipun budaya bangsa lan demoralisasi, ingkang dadas masalah kebangsaan ugi kedah enggal kita usadani. Meski makaten sejatosipun halangan, rintangan lan tantangan ingkang dipun adhepi kita bangsa Indoesia , mboten mligi saking njaban rangkah kemawon, ananging khususipun ing kalangan umat Islam piyambak, rapuhipun ukhuwah Islamiyah kita dados salah satunggal penyebabipun.

            Pramila saking punika , mestinipun kita lajeng saget mendet piwucal adiluhung saking prastowo qurban ingkang dipun lakonaken Nabi kekalih,  inggih punika Nabi Ibrahim as lan Nabi Ismail as,  minangka pepenget dhumateng para pemimpin saha tiang sepuh lan putra-putranipun. Liripun, bilih satunggaling pemimpin kedah saget kangge conto sae wanten ing gesangipun lan ing keluarganipun. Nabi Ibrahim mboten namung paring conto kados pundi tanggung jawabipun minangka pemimpin umat, ananging ugi minangka jejeripun rama ingkang wicaksana, semanten ugi Nabi Ismail minangka conto generasi muda ingkang satuhu  dhateng tiang sepuhipun.

Akhiripun kanthi semangat Idul Adha kita lajengaken pembangunan nasional, kagem anggayuh nagari ingkang majeng ing sedaya bidang. Sumangga sedaya kita aturaken dhumateng para punggowo negeri. Kita minangka jejeripun warga negeri ingkang sae kedah kagungan wawasan ingkang wicaksana, pundi  ingkang sae sumamgga kita sengkuyung, pundi engksng awon sumangga kita dandosi sesarengan murih dados saenipun. Mugia sedaya pemimpin negeri kaparingan hidayahipun sahingga saget mimpin nagari kanthi wicaksana, nuju masyarakat adil makmur Mugia kita manggih kawilujengan ing donya dalah ing akhirat.

Selajengipun kangge penutup khutbah, sumangga kita ngeningaken cipta, nyuwun dhumateng Allah SWT, mugi-mugi sedaya panjangka kita saget dipun kabulaken Allah SWT.

بَارَكَ اللهُ لِيْ وَلَكُمْ فِي الْقُرْآنِ الْعَظِيْمِ، وَنَفَعَنِيْ وَإِيَّاكُمْ بِمَا فِيْهِ مِنَ اْلآيَاتِ وَالذِّكْرِ الْحَكِيْمِ. أَقُوْلُ قَوْلِيْ هَذَا وَأَسْتَغْفِرُ اللهَ الْعَظِيْمَ لِيْ وَلَكُمْ وَلِسَائِرِ الْمُسْلِمِيْنَ مِنْ كُلِّ ذَنْبٍ. فَاسْتَغْفِرُوْهُ، إِنَّهُ هُوَ الْغَفُوْرُ الرَّحِيْمُ.

NB :

(  Khotbah kaping kalih kasumanggakaken para khotib ).

اَللهُ أَكْبَرُ اَللهُ أَكْبَرُ اَللهُ أَكْبَرُ اَللهُ أَكْبَرُ اَللهُ أَكْبَرُ اَللهُ أَكْبَرُ اَللهُ أَكْبَرُ.
اَلْحَمْدُ للهِ عَلىَ إِحْسَانِهِ وَالشُّكْرُ لَهُ عَلىَ تَوْفِيْقِهِ وَاِمْتِنَانِهِ. وَأَشْهَدُ أَنْ لاَ اِلَهَ إِلاَّ اللهُ وَاللهُ وَحْدَهُ لاَ شَرِيْكَ لَهُ وَأَشْهَدُ أنَّ سَيِّدَنَا مُحَمَّدًا عَبْدُهُ وَرَسُوْلُهُ الدَّاعِى إلىَ رِضْوَانِهِ. اللهُمَّ صَلِّ عَلَى سَيِّدِنَا مُحَمَّدٍ وِعَلَى اَلِهِ وَاَصْحَابِهِ وَسَلِّمْ تَسْلِيْمًا كِثيْرًا

أَمَّا بَعْدُ فَياَ اَيُّهَا النَّاسُ اِتَّقُوااللهَ فِيْمَا أَمَرَ وَانْتَهُوْا عَمَّا نَهَى وَاعْلَمُوْا أَنَّ اللهَ أَمَرَكُمْ بِأَمْرٍ بَدَأَ فِيْهِ بِنَفْسِهِ وَثَـنَى بِمَلآ ئِكَتِهِ بِقُدْسِهِ وَقَالَ تَعاَلَى إِنَّ اللهَ وَمَلآئِكَتَهُ يُصَلُّوْنَ عَلىَ النَّبِى يآ اَيُّهَا الَّذِيْنَ آمَنُوْا صَلُّوْا عَلَيْهِ وَسَلِّمُوْا تَسْلِيْمًا. اللهُمَّ صَلِّ عَلَى سَيِّدِنَا مُحَمَّدٍ صَلَّى اللهُ عَلَيْهِ وَسَلِّمْ وَعَلَى آلِ سَيِّدِناَ مُحَمَّدٍ وَعَلَى اَنْبِيآئِكَ وَرُسُلِكَ وَمَلآئِكَةِ اْلمُقَرَّبِيْنَ وَارْضَ اللّهُمَّ عَنِ اْلخُلَفَاءِ الرَّاشِدِيْنَ أَبِى بَكْرٍ وَعُمَر وَعُثْمَان وَعَلِى وَعَنْ بَقِيَّةِ الصَّحَابَةِ وَالتَّابِعِيْنَ وَتَابِعِي التَّابِعِيْنَ لَهُمْ بِاِحْسَانٍ اِلَىيَوْمِ الدِّيْنِ وَارْضَ عَنَّا مَعَهُمْ بِرَحْمَتِكَ يَا اَرْحَمَ الرَّاحِمِيْنَ

اَللهُمَّ اغْفِرْ لِلْمُؤْمِنِيْنَ وَاْلمُؤْمِنَاتِ وَاْلمُسْلِمِيْنَ وَاْلمُسْلِمَاتِ اَلاَحْيآءُ مِنْهُمْ وَاْلاَمْوَاتِ اللهُمَّ أَعِزَّ اْلإِسْلاَمَ وَاْلمُسْلِمِيْنَ وَأَذِلَّ الشِّرْكَ وَاْلمُشْرِكِيْنَ وَانْصُرْ عِبَادَكَ اْلمُوَحِّدِيَّةَ وَانْصُرْ مَنْ نَصَرَ الدِّيْنَ وَاخْذُلْ مَنْ خَذَلَ اْلمُسْلِمِيْنَ وَ دَمِّرْ أَعْدَاءَالدِّيْنِ وَاعْلِ كَلِمَاتِكَ إِلَى يَوْمَ الدِّيْنِ. اللهُمَّ ادْفَعْ عَنَّا اْلبَلاَءَ وَاْلوَبَاءَ وَالزَّلاَزِلَ وَاْلمِحَنَ وَسُوْءَ اْلفِتْنَةِ وَاْلمِحَنَ مَا ظَهَرَ مِنْهَا وَمَا بَطَنَ عَنْ بَلَدِنَا اِنْدُونِيْسِيَّا خآصَّةً وَسَائِرِ اْلبُلْدَانِ اْلمُسْلِمِيْنَ عآمَّةً يَا رَبَّ اْلعَالَمِيْنَ. رَبَّنَا آتِناَ فِى الدُّنْيَا حَسَنَةً وَفِى اْلآخِرَةِ حَسَنَةً وَقِنَا عَذَابَ النَّارِ. رَبَّنَا ظَلَمْنَا اَنْفُسَنَاوَاِنْ لَمْ تَغْفِرْ لَنَا وَتَرْحَمْنَا لَنَكُوْنَنَّ مِنَ اْلخَاسِرِيْنَ. عِبَادَاللهِ ! إِنَّ اللهَ يَأْمُرُنَا بِاْلعَدْلِ وَاْلإِحْسَانِ وَإِيْتآءِ ذِي اْلقُرْبىَ وَيَنْهَى عَنِ اْلفَحْشآءِ وَاْلمُنْكَرِ وَاْلبَغْي يَعِظُكُمْ لَعَلَّكُمْ تَذَكَّرُوْنَ وَاذْكُرُوا اللهَ اْلعَظِيْمَ يَذْكُرْكُمْ وَاشْكُرُوْهُ عَلىَ نِعَمِهِ يَزِدْكُمْ وَلَذِكْرُ اللهِ أَكْبَرْ