KHUTBAH JUM’AT : NIKMATIPUN IMAN

KHUTBAH JUM’AT

NIKMATIPUN IMAN

Dening : ANIS PURWANTO

إِنَّ الْحَمْدَ لِلَّهِ نَحْمَدُهُ وَنَسْتَعِيْنُهُ وَنَسْتَغْفِرُهُ وَنَسْتَهْدِيْهِ وَنَعُوذُ بِاللهِ مِنْ شُرُوْرِ أَنْفُسِنَا وَمِنْ سَيِّئَاتِ أَعْمَالِنَا، مَنْ يَهْدِهِ اللهُ فَهُوَ الْمُهْتَدُ وَمَنْ يُضْلِلْ فَلَنْ تَجِدَ لَهُ وَلِيًا مُرْشِدًا. أَشْهَدُ أَنْ لاَ إِلَهَ إِلاَّ اللهُ وَحْدَهُ لاَ شَرِيْكَ لَهُ وَأَشْهَدُ أَنَّ مُحَمَّدًا عَبْدُهُ وَرَسُوْلُهُ لاَ نَبِيَّ بَعْدَهُ. اَللَّهُمَّ صَلِّ وَسَلِّمْ وَبَارِكْ عَلَي حَبِيْبِنَا وَشَفِيْعِنَا وَمَوْلَنَا مُحَمَّدٍ وَعَلَى آلِهِ وَأصَحابهِ اْلأَخْيَارِ وَمَنْ تَبِعَهُمْ بِإِحْسَانٍ إِلَى يَوْمِ الدِّيْنِ.

قَالَ تَعَالَي عَزَّ مِنْ قَائِلٍ: يَا أَيُّهَا الَّذِينَ آمَنُوا اتَّقُوا اللَّهَ حَقَّ تُقَاتِهِ وَلَا تَمُوتُنَّ إِلَّا وَأَنْتُمْ مُسْلِمُونَ. أَمَّا بَعْدُ.

Ma’asyiral Muslimin jamaah jum’ah rokhimakumullah.

            Kegem pambukaning khutbah, sumangga kita aturaken puja puji syukur ing ngarsa dalem Allah SWT, ingkang sampun paring rahmat saha hidayah dhumateng kita sedaya, sahingga wanten ing siyang punika kita sedaya saget nindakaken dawuhipun, kanthi ihklas karana Allah. Mugi-mugia kita saget manggih kawilujengan ing donya dalah ing akhirat. Shalawat saha salam kita aturaken dhumateng junjungan kita Nabi Muhammad SAW.

Ma’asyiral Muslimin jamaah jum’ah rokhimakumullah.

            Kita tansah wajib rumaos syukur wonteng ing ngarso dalem Allah SWT, dene kita dipun takdiraken dados tiyang-tiyang mukmin. Awit mboten wonten kanikmatan ingkang langkung ageng  malih tinimbang nikmatipun iman.  Allah SWT sampun paring dhawuh kados kasebat ing Al-Quran Surat Yunus ayat 9 :

إِنَّ ٱلَّذِينَ ءَامَنُواْ وَعَمِلُواْ ٱلصَّـٰلِحَـٰتِ يَہۡدِيهِمۡ رَبُّہُم بِإِيمَـٰنِہِمۡ‌ۖ تَجۡرِى مِن تَحۡتِہِمُ ٱلۡأَنۡهَـٰرُ فِى جَنَّـٰتِ ٱلنَّعِيمِ

“Satemene wong-wong kang iman lan nindakake amal-amal salih, dheweke kabeh bakal diparingi pituduh dening Pangerane jalaran saka imane, dheweke kabeh iku kangmili ing sangisore dheweke kabeh kali-kali ana ing suwarga kang kebak kanikmatanne”.

            Ayat punika ngemutaken kita dhumateng tujuanipun gesang ingkang hakiki, ingih punika pados kawilujengan wiwit ing ndonya ngantos ing akhirat . pramila sanikmat-nikmatipun gesang punika gesang dados tiyang mukmin. Badhe kados punapa kemawon kawontenanipun donya, piyambakipun mboten badhe kengeng pengaruh. Malah gonjang ganjingipun kawontenan ndonya ingkang kados punapa kemawon mboten badhe ndadosaken piyambakipun rumaos kapitunan. Awit sedaya punika mboten dipun rewes, sauger tetep madhep mantep lan mantheng dhateng tujuanipun inggih punika anggayuh kawilujengan ing kampung akhirat. Ndonya punika saget ugi dipun anggep penting, ananging kampun akhirat langkung penting malih . Tujuan gesang cetha wela-wela, inggih punika anggayuh suwarganipun Allah SWT. Mila saking punika reroncening pakaryan saha peranganipun pambudi daya ugi tetep cetha, inggih punika sedaya pakaryan punapa kemawon kedah kagungan biji sae, awit sedaya amal dalah pakaryan ing ndonya mangke badhe kita tanggeljawabaken ing ngarso dalem Allah SWT. Bilih bijinipun sae badhe pikantuk kanugrahan saking Gusti, bilih bijinipun awon mangke badhe pikantuk pidana saking Gusti Allah.

Ma’asyiral Muslimin jamaah jum’ah rokhimakumullah.

            Pramila yen toh ing babagan kadonyan kita dereng rumaos bekja, dereng rumaos mulyo, punika nomo limrah lan mboten aeng, awit sedaya punika namung urusan ndonya. Sepindah malih , sedaya punika namung urusanipun donya, awit tembung donya punika saking tembung arab inggih punika dana- yadnu- dun-yan, ingkang maknanipun cedhak utawi caket. Dados urusan donya punika urusan ingkang cedhak utawi tembung indonesianipun jangka pendhek. Tujuan-tujuanipun ugi tujuan-tujuan ingkang cedhak , tujuan jangka pendhek. Mila saking punika, saben-saben tiyang mukmin mboten badhe goreh manahipun amargi saking ruginipun urusan-urusan kadonyan, nanging rumaos kapitunan rumaos rugi manawi ing babagan keakhiratan piyambakipun ketinggalan.

            Sepindah malih gonjang ganjingipun babagan donya, punika urusan jangka pendek, ingkang mesti wonten solosinipun. Malah kita ing saat punika taksih ing  dalem misibah pandemic corona. Mestinipun mboten andadosaken gorehipun manah, anangin kita tetep ing ndalem waspada, tetep manut tatanan punapa ingkang sampun dipun andaraken dening pihak pemerintah. Sebab nyatanipun virus corona mboten preduli lan mboten pilih-pilih. Sok sinten ingkang mboten purun njagi pribadi saking proses penularan, kados pundi kemawon hebatipun tetep badhe ketaman. Kados pundi kemawon, nyatanipun corona tahsih wonten, malah ing akhir-akhir punika saya ndodro jumlahipun. Sumonggo aturanipun pemerintah kita agem, tetap jaga jarak, ngindari kerumunan, ngagem masker, sering cuci asto ngangge sabun lan mboten salaman rumiyin.

Sumangga tetep ing swasana keprihatinan, lan tetap waspada lan ngatos-atos. Sebab musibah punika mboten milih-milih, sedaya saget ugit kengeng, saget ugi ketaman. Kasebat wonten ing Al-Qur’an Surat Al-Anfal ayat 25 :

وَٱتَّقُواْ فِتۡنَةً۬ لَّا تُصِيبَنَّ ٱلَّذِينَ ظَلَمُواْ مِنكُمۡ خَآصَّةً۬‌ۖ وَٱعۡلَمُوٓاْ أَنَّ ٱللَّهَ شَدِيدُ ٱلۡعِقَابِ

“Lan sira kabeh padha wedia marang siksane Allah sing temenan ora mung khusus ngenani wong-wong sing dhalim ing antarane sira kabeh bae. Lan sira kabeh padha sumurupa satemene pasiksane Allah iku abot banget ”.

            Makaten para sederek, keterangan singkat ing siang punika, sepindah malih sumangga kita tengenaken anggen kita mbudidaya kagem anggayuh kabegjan ing kampun akhirat, ananging ugi mboten nglirwakaken babagan kadonyan. Wilujeng ing donya dalah ing akhirat , amin ya rabbal ‘alamin.

 بَارَكَ اللهُ لِيْ وَلَكُمْ فِي الْقُرْآنِ الْعَظِيْمِ، وَنَفَعَنِيْ وَإِيَّاكُمْ بِمَا فِيْهِ مِنَ اْلآيَاتِ وَالذِّكْرِ الْحَكِيْمِ. أَقُوْلُ قَوْلِيْ هَذَا وَأَسْتَغْفِرُ اللهَ الْعَظِيْمَ لِيْ وَلَكُمْ وَلِسَائِرِ الْمُسْلِمِيْنَ مِنْ كُلِّ ذَنْبٍ. فَاسْتَغْفِرُوْهُ، إِنَّهُ هُوَ الْغَفُوْرُ الرَّحِيْمُ.